RSS Feed
Twitter
2:05 AM
Unknown
ផ្សារមូលបត្រតែងទទួលរងនូវការលើកឡើងអំពីគំនិតអវិជ្ជមានពីសំណាក់ ឬក្រុមអ្នកធ្លាប់ប្រឡូកក្នុងទីផ្សារនេះ ដោយពួកគេលើកឡើងថា ការជួញដូរភាគហ៊ុនមិនខុសគ្នានឹងការលេងល្បែងស៊ីសងទេ។ តើទស្សនៈនេះពិតជាត្រឹមត្រូវទេ?
មន្ត្រីផ្នែកឈ្មួញជើងសា លោក ប៊ុន ចាន់តារា មកពីក្រុមហ៊ុនភ្នំពេញ ស៊ីឃ្យូរីធី ភីអិលស៊ី ដែលជាក្រុមហ៊ុនធានាទិញមូលបត្រ (underwriter) មួយ បានពន្យល់ថា ល្បែងស៊ីសងខុសពីការជួញដូរហ៊ុនក្នុងផ្សារមូលបត្រ។ ល្បែងស៊ីសង គឺ ៥០-៥០ ពឹងលើសំណាង ចំណែកភាគហ៊ុនពឹងផ្អែកលើបច្ចេកវិទ្យា មានន័យថា ពឹងផ្អែកលើការវិភាគរបាយការណ៍ហិរញ្ញវត្ថុរបស់ក្រុមហ៊ុន។
ក្នុងទីផ្សារ បើក្រុមហ៊ុនបោះផ្សាយលក់មូលបត្រមានរបាយការណ៍ល្អ ភាគហ៊ុននឹងអាចឡើងថ្លៃ នោះអ្នកវិនិយោគនឹងទិញ ដោយប្រាកដថា ហ៊ុននោះនឹងឡើងថ្លៃ។ ដូច្នេះបើរបាយការណ៍ហិរញ្ញវត្ថុមិនល្អ នោះអ្នកវិនិយោគក៏មិនទិញដែរ។
លោកបន្ថែមថា បើអ្នកលេងបានទិញហ៊ុនក្នុងតម្លៃណាមួយ មួយរយៈពេលក្រោយមកថ្លៃហ៊ុនកំពុងធ្លាក់ចុះ បើមិនលក់ ក៏វាមិនខាតបង់ដែរ។ នេះជាការខុសគ្នារវាងល្បែងស៊ីសង និងការជួញដូរភាគហ៊ុនក្នុងទីផ្សារមូលបត្រ
ទីផ្សារមូលបត្រគឺជាកន្លែងសម្រាប់ធ្វើការជួញដូរមូលបត្រ និងឧបករណ៍ហិរញ្ញវត្ថុដទៃទៀត។
តាមនិយមន័យច្បាប់ស្តីពីការបោះផ្សាយ និងការជួញដូរមូលបត្រមហាជន «វាសំដៅដល់ទីផ្សារ ឬទីកន្លែងជួញដូរមូលបត្រ ឬប្រព័ន្ធដែលផ្តល់មធ្យោបាយនៃការធ្វើសំណើលក់ ផ្ទេរ ឬស្វីការទិញ-លក់មូលបត្រ»។ ឧបករណ៍ហិរញ្ញវត្ថុ ដែលតែងតែត្រូវបានជួញដូរលើទីផ្សារនេះ រួមមានមូលបត្រកម្មសិទ្ធិ មូលបត្របំណុល និងឧបករណ៍និស្សន្ទ ជាដើម។
ចំណែកអ្នកចូលរួមជួញដូរភាគហ៊ុនក្នុងទីផ្សារមូលបត្រមានច្រើនប្រភេទដូចជា អ្នកជំនាញសេដ្ឋកិច្ច អ្នកជំនាញហិរញ្ញវត្ថុ មន្ត្រីរាជការ គ្រូបង្រៀន និងសិស្សនិស្សិត ជាដើម។ ដូច្នេះក្នុងចំណោមអ្នកទាំង នោះមិនប្រាកដថា ពួកគេមានការយល់អំពីចំណេះដឹងទីផ្សារមូលបត្រឡើយ។
ជាទូទៅ អ្នកប្រឡូកក្នុងវិស័យនេះអាចត្រូវបានគេបែងចែកជា ៣ប្រភេទ គឺ អ្នកវិនិយោគ ឈ្មួញជើងសា និងក្រុមរកកម្រៃតាមគ្នីគ្នា។ ចំពោះអ្នកវិនិយោគ ពួកគេមានយុទ្ធសាស្ត្រវែងឆ្ងាយ និងច្បាស់លាស់។ ក្រុមអ្នកវិនិយោគអាចទិញហ៊ុនតាំងពីក្រុមហ៊ុនបោះផ្សាយលក់មូលបត្រក្នុងផ្សារមូលបត្រតាំងពីដំបូង មិនរងឥទ្ធិពលនៃបម្រែបម្រួលថ្លៃហ៊ុន ព័ត៌មានបំភ្លៃ ព័ត៌មានប្រចាំថ្ងៃជាដើម។ ពួកគេអនុវត្តតាមយុទ្ធសាស្ត្រដែលបានកំណត់ ទិញដូរតាមផែនការ និងការកំណត់ពេលវេលាច្បាស់លាស់។ ក្រុមមនុស្សប្រភេទនេះចាត់ទុកផ្សារមូលបត្រមិនមែនកន្លែងលេងល្បែងស៊ីសងនោះទេ។
ចំណែកឈ្មួញជើងសាជាក្រុមមនុស្សមានការយល់ជ្រៅជ្រះអំពីផ្សារមូលបត្រ ចេះវិភាគរបាយការណ៍ការហិរញ្ញវត្ថុ និងគ្រប់គ្រងព័ត៌មានបានទាន់ពេលវេលា។ ចំពោះក្រុមរកកម្រៃតាមគ្នីគ្នា ពួកគេតែងទិញដូរតែងស្ដាប់តាមគ្នីគ្នា ហើយធ្វើការសម្រេចចិត្តតែម្ដង។ ពួកគេមិនមានយុទ្ធសាស្ត្រ ឬការយល់ពីការគ្រប់គ្រងព័ត៌មានឡើយ។ ក្រោយពេលប្រឡូកក្នុងមួយរយៈ ពួកគេនឹងខាតបង់ហើយលើកឡើងថា ការលេងភាគហ៊ុនគឺជាល្បែងស៊ីសង៕
0 comments:
Post a Comment